Ministri i Arsimit dhe Shkencës, Hajrulla Çeku, së bashku me kryetarin e Këshillit të Prindërve të Kosovës, Besnik Dragusha, bashkëbiseduan me prindërit e rajonit të Gjilanit për Strategjinë e Arsimit 2035+. Në këtë takim mori pjesë edhe zëvendësministri i parë i Arsimit dhe Shkencës, Përparim Kryeziu.

U diskutua për sfidat e përditshme në shkolla, shqetësimet e prindërve dhe ndryshimet që synohen dhe i duhen sistemit arsimor: nga cilësia e mësimdhënies dhe tekstet shkollore, te siguria në shkolla dhe organizimi i mësimit gjithëditor.

Ministri theksoi se prindërit janë partnerë të pazëvendësueshëm në përpjekjen tonë për arsim më cilësor, dhe  se do t’i vazhdojmë këto takime në të gjitha rajonet, duke e bërë bashkëbisedimin me prindërit pjesë të rregullt të punës sonë.

Kryetari i Këshillit të Prindërve të Kosovës, Besnik Dragusha, theksoi rëndësinë e përfshirjes aktive të prindërve në identifikimin e sfidave dhe propozimin e zgjidhjeve konkrete për sistemin arsimor.

Bashkëbisedimi në Gjilan është pjesë e konsultimeve me prindërit në rajonet e Kosovës, me synimin që Strategjia e re e Arsimit 2035+ të hartohet përmes një procesi gjithëpërfshirës, duke marrë parasysh nevojat dhe përvojat e nxënësve, prindërve dhe akterëve të tjerë të sistemit arsimor. Takimi i radhës do të mbahet sot në Ferizaj me prindër të rajonit të Ferizajt.